Судскиот процес за потонувањето на бродот „Илинден“ ќе продолжи на 18-ти јануари во Основниот суд во Охрид. Обвинети за несреќата во која животот го загубија 15 бугарски туристи се капетанот на бродот Сотир Филески и претставникот на осигурителната компанија „Лојд“ Бранко Бајиќ, кој не се појави на првото рочиште бидејќи уредно не му била врачена поканата од судот, поради што процесот беше одложен. Исто така бранителите на дел од оштетените бугарски граѓани немаа уредни полномошна.
На утрешното рочиште, според пишувањата на медиумите во соседството, се очекува бугарските адвокати да побараат нова, поширока експертиза за протонувањето на бродот „Илинден“. Тие не биле задоволни од извршеното вештачење и бараат во докажувањето на причините за несреќата да се вклучат експерти за морски води.
Бродот „Илинден“ потона на 5 септември 2009 година во близина на кампот Елешец на длабочина од околу 6 метри. На бродот кој бил регистриран за 45 патници во критичниот момент заедно со посадата имало 57 лица.
OhridNews
