Македонија е земја на вкусот. Ако седнеш да јадеш апетитот ќе ти се зголеми уште по првиот залак од храната, која што ќе ти ја донесат. Ако се напиеш само една голтка вино, веќе никогаш не ќе можеш да ја згаснеш жедта. Тука луѓето знаат како да и се насладат на храната, а јадењето е своевиден ритуал. Ова се наведува во текстот насловен „Македонија – земја на гурманите и на гостопримството“ што го објави пред извесно време бугарскиот весник „24 Часа“ .

Весникот пишува дека многуте сончеви денови се извор на богатите вкусови и ароми во македонската кујна, а регионот се одликува со клима, која е подобна за одгледување на овошје, зеленчук и разновидни билки и зачини.

-Секоја година, овоштарниците и градините се полни со неверојатно вкусни плодови, бочвите се полни, а месото е природно и исклучително квалитетно. Во Македонија е лесно да се одговори на кулинарските желби на секого – како на оние кои сакаат специјалитети од месо или риба, така и на оние кои претпочитаат разнообразна вегетаријанска храна. Секое годишно време има определена сезонска храна, а секој крај има свој специјалитет. Едноставно, ви се отвора голем избор на храна и при тоа не може да згрешите, пишува бугарскиот весник.

Во објавениот текст се опишува и македонската долговековна традиција за производство на вино како и исклучителниот квалитет на македонските вински производи.

-Долината на вкусовите ја задоволува жедта на секој турист, кој ќе дојде да го дегустира најквалитетното македонско вино. Има една легенда според која некогаш во најсушниот регион во Македонија – Тиквешкиот имало повеќе вино отколку вода.Во античка Македонија се одржувале т.н. „Денови на Дионис“ во чест на богот на виното. Секоја голтка македонско вино е совршенство дадено од боговите. Лозарите за свој заштитник го имаат Св. Трифун, а 14 февруари е денот посветен на тој светец. Македонија има 280 сончеви денови подобни за одгледување винови лози со богатство од предизвикувачки ноти на моќни и уникатни ароми. Македонските винарски визби целосно ги отвораат вратите за сите посетители. Тие заедно со екипа на сомелиери, на весел, неформален и релаксирачки начин може да дегустираат вина во комбинација со различни видови храна.Ве каниме на деликатесна и винска турнеја, која ќе ви помогне да ги научите тајните на неоткриената Македонија, пишува меѓудугото „24 Часа“.

OhridNews