Членовите на хорската атракција „Вива Вокс“ се прошетаа низ Охрид

Хорската атракција од Белград, Вива Вокс, која молскавично го освои светот со неверојатните гласови кои експериментираат со различни музички жанрови и ги поместуваат границите на невозможното кога е во прашање човечкиот глас, денеска пристигнаа во Охрид. 

Како што информираат од фестивалот, дел од членовите успеаја да најдат време за прошетка  по охридската чаршија.  Воодушевени од убавините на градот, ја слушнаа приказната за охридскиот бисер и надалеку познатата охридска пастрмка.

Се воодушевија и од прекрасниот простор во Предворјето на Света Софија и открија дека претходно слушнале за црквата која за уметниците преставува најдобрата сцена кога станува збор за акустиката на концертите. Дел пак од членовите на хорот денот го минаа на плажа.

^{Членовите на хорската атракција „Вива Вокс“ се прошетаа низ Охрид}

Хорот Вива Вокс од Белград е формиран пред скоро 10 години од група на матурирани средношколци и нивниот професор по музика. Звукот на хорот Вива Вокс претрпе многу трансформации, а денес е окарактеризиран по автенитчните а капела интерпретации на поп-рок и алтернативна музика, придружена со битбокс. Обработката на Вива Вокс, во а капела на Ду Хаст, песна од германскиот индустријал-метал бенд Раммстеин стана хит на интернет во летото 2011 година, и им донесе светска популарност за само неколку дена.

Хорската атракција „Вива Вокс“ утре вечер во рамки на фестивалот „Охридско лето, ќе одржи концер на Античкиот театар во Охрид со почеток во 21 часот.

OhridNews