Ученици од шесто, седмо и осмо одделение во основното училиште „ Братство и единство“ и по изминати дваесеттина дена од почетокот на новата учебна година не следат настава по германски јазик . Како што се наведува во реакцијата на родителите, причина е што во училиштето нема соодветен кадар, односно професор кој ќе го предава овој странски јазик.
– Реагиравме и до директорот на училиштето кој ни вети дека проблемот наскоро ќе биде решен. Што ќе биде со пропуштените часови, односно како и кога ќе се надокнадуваат, прашуваат родителите.
Директорот на ОУ „ Братство и единство“, Муамер Доко информира дека од локалната самоуправа му било кажано дека проблемот со недостиг на кадар по германски јазик ќе биде решен до почетокот на идната недела.
– Добивме ветување дека во текот на идната седмица ќе биде ангажиран професор по германски јазик во нашето училиште и учениците ќе почнат да следат настава од 1 октомври, изјави Доко.
Пропуштените часови ќе се надоместат во текот на наредните седмици.
Т.К.
