Во својот говор пред присутните, Градоначалникот на Охрид, Александар Петрески рече дека градејќи го современото општество, охриѓани имаат задача да ја зачуваат традицијата и духовните вредности кои како аманет ги оставил Свети Климент.
-Мудроста, духовноста и големината на делото на Свети Климент Охридски е патоказ за вистинскиот пат, по кој треба да чекориме. Неговиот чудотворен дух сеуште многу силно се чувствува во Охрид, а во време на искушенија и наталожени проблеми секогаш ја повикуваме таа духовна сила да ни помогне и да застане со нас во одбрана од злото, рече Петрески.
Тој нагласи дека сегашноста и идната на градот Охрид не треба да се жртвува поради лични, теснопартиски и дневнополитички интереси.
Инаку големата сала на Центарот за култура “Григор Прличев”, во која се одржа свечениот собир беше претесна да ги прими сите почитувачи на ликот и делото на големиот чудотворец. Официјалната свеченост ја разубавија учениците на Охридската гимназија, изведувајќи го својот мултимедијален проект посветен на Свети Климент и историјата на Охридската Архепископија.
