Процедурите за избор на директори во основните училишта „Христо Узунов“ и „Братство и единство“ се во завршна фаза. Попладнево се очекува претставник од Бирото за развој на образованието и членови од Училишниот одбор од ОУ „Христо Узунов“ да извршат интервју со двајцата пријавени кандидати за директор во училиштето, по што согласно законската процедура, Училишниот одбор ќе донесе одлука кој од пријавените кандидати да го достават како предлог до градоначалникот Александар Петрески, кој го има конечниот збор за тоа кој ќе биде новиот директор на училиштето.
Истата процедура деновиве се очекува да се спроведе и во ОУ „Братство и единство“, што значи дека во најскоро време двете училишта ќе добијат нови директори.
Неодамна, беше избран нов директор и во ОУ „Григор Прличев“, каде оваа функција и беше доделена на професорката по англиски јазик, Лилјана Спировска.
Во трите училишта кон крајот на минатата година, тогаш актуелните директори поднесоја оставка, по што беа поставени ВД директори до изборот на новите.
