По серијата инциденти на прволигашките и на второлигашките фудбалски терени на кои главна цел беа судиите, за наредниот период Фудбалската федерација на Македонија (ФФМ) презеде посебни мерки за нивна заштита.
ФФМ ќе ги заштити арбитрите – момент од натпревар во третата лига
Повод за ваквите мерки за заштита беше последниот инцидент на мечот Влазними – Беласица, кога главниот судија Симеон Стефков беше нападнат на полувремето, по што добил тешки повреди и завршил во охридската болница.
– Од пристигнувањето на судиската четворка, па сé до нивното заминување, од страна на МВР ќе има задолжено лице што ќе биде со нив. Контакти со судиската четворка не се дозволени. Клубот е должен да стапи во контакт со соодветното СВР, од каде што ќе му биде дадено името и презимето на лицето што ќе биде задолжено за судиската четворка, за што ќе го известат делегатот на натпреварот – се вели во соопштението на комесарот на натпревари Миле Спиркоски до клубовите од Првата и од Втората лига .
И покрај тоа што во нашиот шампионат важи девизата дека фудбалот се игра за официјалните лица, сепак тоа не им дава за право на чинителите својот бес да го искалат над арбитрите, кои постојано се цел на незадоволните страни од фудбалската игра, а често манифестирањето на нивното незадоволство ги преминува границите на толеранцијата.
Фото “ФК Кораб“
Ohridnews
