Општинскиот натпревар, кој се реализира во соработка со основните училишта во градот, содржи теоретски дел во кој кандидатите ќе бидат писмено тестирани за нивните познавања на сообраќајните знаци, правила и прописи, што ќе се одржи во ОУ „Григор Прличев“ и практичен дел – вешто возење со велосипед од страна на учениците на уреден полигон, што ќе се одржи претпладне на градскиот кеј.
Организаторот на натпреварот за сите учесници обезбеди пригодни признанија и подароци, а најдобрите и највештите натпреварувачи ќе добијат вредни награди и подароци, како во поединечна, така и во екипна конкуренција. Пригодни подароци и признанија се обезбедени и за одговорните наставници – ментори на екипите кои ќе ги претставуваат основните училишта.
Општинскиот натпревар претставува продолжение на започнатите активности на ОСБСП за унапредување на сообраќајно – техничката култура на учениците и најмладите учесници во сообраќајот во нашата општина. Од најуспешните и највештите натпреварувачи ќе биде формирана општинска екипа, која ќе земе учество на регионалниот натпревар „Детски семафор“, што ќе се одржи на 6-ти мај во Дебар. Државниот натпревар ќе се одржи на 28-ми мај во Скопје.