Усвоен е збирниот извештај за спроведените вкрстени, административни и теренски проверки. Содржи детални податоци по која основа се вршени проверките, но останува нејасно дали се избришани само илјада и 100 починати и двајца со двоен матичен број. ДИК не се трудеше да брише записи, туку да овозможи остварување на гласачкото право, објаснуваат шестмината членови кои гласаа „за“.
Двајцата членови од СДСМ не присуствуваа, а претседателот Чичаковски гласаше против. Тој прво изрази сомневање во правната важност на информациите од МВР на кои не е потпишан министерот, што за другите членови не е спорно.
За Чичаковски, остануваат сомнителни гласачите без живеалиште во земјава. Од 139 илјади, 42 илјади се дијаспора, но за другите нема прецизни податоци.
Според Силвана Бонева и Сашко Срцев, расчистени се сите дилеми и Избирачкиот список може да гарантира веродостојни и кредибилни избори.
Бурни реакции предизвика предлогот на претседателот Чичаковски, да се објави на веб страницата список на гласачите со име, презиме, адреса и место на гласање. Мнозинството вели дека тоа е во спротивност со укажувањето на Дирекцијата за заштита на личните податоци. Претседателот беше обвинет за опструкции, по што Чичаковски го повлече предлогот. Ќе го поднесе на наредната седница.
OhridNews
Извор: „Телма“
