По синоќешната долга расправа по двата приговора поднесени од ВМРО-ДПМНЕ за гласачкиот процес во Кичево, Државната изборна комисија (ДИК) ги одби приговорите за Кичево, со што таму нема да има прегласување за избор на градоначалник.
Заменикот на овластениот предлагач од ВМРО-ДПМНЕ, пред ДИК ги образложи двата приговора поднесени за две избирачки места, каде било забележано нарушување на тајност на гласање, семејно гласање, издавање гласачки ливчиња преку ред, а исто така биле забележани и повеќе лица зад параванот.
Претседателот на ДИК, Борис Кондарко, на членовите им предочи дека во записникот на Општинската изборна комисија (ОИК) немало никаква забелешка, а забелешката до ОИК е поднесена половина час по истекувањето на рокот.
На приговорот на ВМРО-ДПМНЕ се спротивстави и потпретседателот на ДИК, Субхи Јакупи од ДУИ.
Вториот приговор се однесуваше дека на избирачкото место не светела доволно силно УВ ламбата и спрејот не оставал трага на показалецот.
ДИК ги одби и двата приговора за Кичево, при што членовите на ДИК предложени од ДУИ и ДПА, гласаа против приговорите, СДСМ беа воздржани, а ВМРО-ДПМНЕ гласаа за прифаќање на предлогот.
Makfaks
