Најавата дека трите природни езера, во пакет со Дебарското Езеро ќе бидат издадени под концесија на еден концесионер кој ќе управува и со стопанскиот и со рекреативниот риболов, наиде на негодување кај спортско –риболовните здруженија кои согласно распишаниот тендер за концесионирање од март 2011 година очекуваа да ги добијат дозволите за рекреативен риболов. Тие официјално не добиле известување за промена на начиниот на концесионирање, но сметаат дека одлуката еден правен субјект да управува и со стопански и со рекреативен риболов е незаконска и неуставна, бидејќи ќе овозможи создавање на монопол.
– Тоа во голема мера ќе се одрази и на туризмот затоа што државата ќе треба да го поништи распишаниот тендер и да отвори нова постапка, која не може да заврши пред месец август, што значи дека и во претстојната туристичка сезона нема да биде дозволен рекреативен рибиолов на Охридското и другите езера, изјави за OhridNews Радован Димитриески од риболовното здружение „Св. Апостол Петар“.
Димитриески тврди дека дека е направена погрешна проценка и на дозволените квоти за излов од страна на Хидробиолошкиот завод, поради што спортските риболовци бараат да се направи ревизија на риболовните основи што ги изготви научната институција.
Охридските спортски риболовци велат дека се во постојан контакт со колегите од Дојран и Дебар и дека по добивање на официјално известување за доделување на на концесиите соодветно ќе реагираат.
