Македонија и Албанија треба да го ревидираат Договорот за регулирање на нивото на Охридското Езеро, сметаат експертите. Тие посочуваат дека нивото на Охридското Езерро се регулира со Билатералниот договор помеѓу Македонија и Албанија кој е склучен пред 50 години, кој, според нив, не кореспондира со сегашните состојби.
Во Билатералниот секретаријат за заштита на Охридското Езеро, сметаат дека регулирањето на нивото на Охридското Езеро треба да биде предмет на научна анализа со која предвид ќе се земат и климатските промени кои несомнено влијаат на осцилациите на езерото.
– Треба да се формира заедничка комисија во која ќе бидат вклучени најдобрите научни кадри и експерти за води, за енергетика и за земјоделство од Македонија и Албанија, кои ќе ги утврдат новонастанатите состојби, врз основа на што, доколку е потребно, да се донесе и одлука за ревидирање на потпишаните документи, вели Дејан Паноски од Билатералниот секретаријат за заштита на Охридското Езеро.
Експертите укажуваат дека е потребна стручна експертиза и за Дримскиот басен со која ќе се предвидат и мерки за ублажување на последиците од природни катастрофи, какви што во моментов го зафатија регионот.
