Кандидатите што ќе аплицираат на новите работни места, а за кои изминатиот период беа распишани од страна на Министерството за здравство, ќе треба да полагаат посебни тестови за утврдување на нивната способност. Министерствотовчера на својата веб-страница постави примерок на тест по чиј урнек ќе бидат подготвувани тестовите што ќе ги полагаат докторите при стручниот дел од испитот за вработување во јавните здравствени установи.
Според Министерството, со новата процедура за прием на здравствените работници се очекува да бидат вработени најкомпетентните и со најголемо знаење.
– Владата преку Министерството за здравство се одлучи да отвори 400 нови работни места во ЈЗУ. При вработувањето ќе има нови критериуми, кои досега не биле случај и првпат ќе почне да се применуваат членот 160 од Законот за здравствената заштита, кој детаљно предвидува кој ќе биде начинот на вработување на здравствени работници – се вели во соопштението.
Прв критериум е просекот што го имаат здравствените работници со високо образование и тој носи 40 бода. Вториот, кој носи 60 бода е поделен на два поткритериума (полагање стручен дел, кој носи 40 бода и познавање еден од светските јазици – англиски, германски или француски јазик, кој носи 20 бода).
