Злоупотребите за рекламирање европски вредности од страна на СДСМ и градоначалникот Стојаноски се видливи пред охриѓани. Градоначалникот Стојаноски заедно со директорите на Јавните претпријатија се испратени во неуспешна мисија од својот ментор Зоран Заев да нудат лажна надеж. Наместо да бидат на своите работни места, тие водат гола дневна политика под превезот на промоција на референдумската кампања, се обидуваат да го подобрат нивниот личен рејтинг кој е никаков и резултат на неработењето и неспособноста, рече на денешната прес конференција претседателот на општинската ВМРО ДПМНЕ, Сашо Донев.
– Стојаноски без срам и перде им зборува на граѓаните за евроатланска интеграција иако е прочитан како буквар дека води штетни политики за Охрид. За каква европска иднина зборува Стојаноски кога во Охрид нема реализирано ниту еден капитален проект? Со неспособноста и незнаењето да се реализираат проекти свесно се дозволи да се извршат околу 50 милиони денари пари на граѓаните на Охрид од сметката на општина Охрид. Оваа власт нема ништо европско и никакви европски вредности, напротив води политики кои не носат раст и напредок и не работат за интересите на граѓаните, рече Донев.
Тој додаде дека не е европска вредност вработување партиски војници, наместо квалитени кадри, како и дека европски принципи се кога ќе има инфраструктурни проекти, а не дупки низ градот, раскопани и неасфалтирани улици.
– Не е европска вредност на секој чекор да се создаваат депонии и кучиња-скитници да шетаат низ целиот град. Европска вредност е модерен туризам, а не недостапни јавни тоалети и санитарни контејнери. Не е европска вредност забавувањето со реализација на изградбата на автопатот Кичево-Охрид и изградбата на базенот. Укинивањето на летовите за Лондон и Полска од Охридскиот аеродром не се европски принципи. Општина Охрид досега има најниско реализиран буџет. За кратко време падна маската на Стојаноски дека ќе биде градоначалник на сите граѓани, рече Донев.
OhridNews
