Примената на специјализирана јога програма како дел од интегралната рехабилитација на пациентите во Заводот започнала во мај 1992, тогаш поддржана од докторите во центарот: д-р Марјан Котлар, д-р Тоше Клишески, д-р Илија Прангоски и д-р Зимоски, потоа и од директорот, д-р Никола Бакрачески.
Програмата е прилагодена за рехабилитација на кардиоваскуларните заболувања и содржи практичен и едукативен дел. Практичниот дел содржи техники за релаксација, техники за дишење, психофизички вежби, асани и техники на прочистување.
– Со оваа програма се активира телото без дополнително оптретување на срцето, се подобрува циркулацијата на крвта, се олеснува и подобрува работата на кардиоваскуларниот систем, се учи како да се подобри психичката и физичката релаксација, се подобрува процесот на дишење, се зголемува отпорноста кон стресот, се учат основите на свесно пешачење за зголемување на физичката и психичката издржливост, координација на движење и дишење и зголемување на кондицијата. Резултатите и искуствата од овој проект се сумирани во истражувачка студија и се презентирани на домашни и меѓународни научни конгреси и симпозиуми за медицината, јогата и холистичката медицина, објаснува професорот по јога, Тасески.
До сега над 1500 пациенти кои биле на рехабилитација во центарот стекнале вештина и знаење како да се справат со болестите и како да си го олеснат животот преку јога вежбите. Во неколку наврати, јога вежбите биле користени и како дел од програмата за рехабилитација и во дел од останатите здравствени установи во Охрид и Струга.
Современиот начин на живот кој кај многу луѓе наметнува појава на хроничен стрес најчесто е причина за кардиоваскулраните заболувања. Јогата како систем на техники за постигнување и одржување здраво тело, емоционална стабилност и духовен развој, овозможува да се влијае врз ризичните фактори, и превентивно да се влијае преку контролирање на стресот и активноста, додаваат стручните лица.
