Две децении патот за Галичица затворен во зима, а сакаме да развиваме туризам

Патниот правец Р-504, Трпејца – Отешево, кој поминува низ Националниот парк Галичица, во зимскиот период не се одржува и е затворен за сообраќај. Движењето со моторни возила по овој пат е забрането дури и кога временските услови се поволни, поради што туристите и охриѓани не можат да уживaат во природните убавини на Галичица.

–Може да се оди со возило на Галичица само на сопствена одговорност, но не е дозволено тој да се употребува, а полицијата строго казнува доколку се користи тој пат. Тоа е штета за Охрид и за туризмот и затоа ги повикувам сите релевантни фактори во најкус можен рок да го решат ова прашање, за да можат охриѓани и туристите да го поминуваат слободното време на познатите излетнички места  на Галичица, рече Џепароски.

На ваквата состојба со години реагира и Локалната самоуправа која исто така бара патот на Галичица да се одржува и во зима, за да можат да се искористат можностите кои оваа планина ги нуди за развој на туризмот. Од Македонија пат укажуваат дека во моментов не постојат технички услови за одржување на овој патен правец, а според надлежните нема ниту економска оправданост за тоа, затоа што на Галичица не постојат туристички содржини кои масовно се користат. Ваквото оправдување според експертите не држи затоа што основен предуслов за развој на туризмот претставува токму инфраструктурата, која целосно е запоставена од државата.

-Асфалтниот пат кој поминува низ националниот парк Галичица е инфраструктура и некој треба да го направи. Тој е затворен затоа што не ги исполнува стандардите за безбедно одвивање на сообраќај. Но тоа не е од сега, овој пат е  затворен од кога Македонија е самостојна. Значи 20 години никој не го поправил. Ако бил затворен година, две, три, ќе речеме од предострожност е тоа, но доколку 20 години е затворен, а сигурно уште 20 ќе биде затворен, тоа покажува дека недостига желба кај институциите да направат нешто за да може просле приватниот сектор да искреира квалитетен туристички производ, изјави за OhridNews, Антонио Додески, генерален секретар на здружението на водичи на планина.
 
Според одредени проценки, за да се обезбеди континуирана проодност на  патниот  правец Р-504, треба да има посебен  пункт на Галичица и да се подобри безбедноста на патот кој е изграден во средината од минатиот век, што според груби пресметки на експертите би чинело неколку милиони евра.

Патот преку Галичица повторно прооден ќе биде на пролет.