Робин ван Перси по освојување на титулата во Премиер лигата има уште една причина за задоволство. По суспензијата на Суарез од десет натпревари, стана јасно дека Уругваецот ќе ги пропушти сите натпревари до крајот, затоа Холанѓанецот остана осамен во трката за најдобар стрелец во најсилната англиска лига.
Ван Перси е прв со 24 голови, Суарез има еден помалку односно 23. Единствен фудбалер, кој може да го загрози голгетерот на “ѓаволите“ е Герет Бејл со 18 погодоци. До крајот на Премиер лигата остануваат уште четири натпревари, а Велшанецот ќе треба добро да ги намести нишански справи за да го симне Ван Перси од врвот.
Холандската машина за голови пред сезоната направи трансфер од Арсенал во Манчестер Јунајтед и во првата сезона успеа да освои трофеј во Премиер лигата, што не му успеа со “топџиите“ цели осум години.
Мх.П.
