Единаесета Охридска ПЕН конференција

„Слободата и стравот“ е тема 11-та Охридска ПЕН конференција, што започна денеска. На конференцијта учествуваат 20 претстaвници на ПЕН центри од странство и уште толку писатели од Македонија, кои се уште една потврда на високото реноме што оваа конференција го ужива не само во регионот туку и во Европа, ни изјави претседателот на македонскиот ПЕН, Ристо Лазаров. Според него темата на конференцијата е типично ПЕН-овска. „Слободата затоа што секогаш неминовно е дел од работата на ПЕН-от, а стравот за да се постават многу важни прашања што ни се случува  среде слободата и демократијата, како, кој и зошто го произведува стравот“, рече Лазаров.

Според филозофот Ферид Мухиќ, стравот е поврзан со имањето или немањето слобода. „Најголем дел од луѓето повеќе ја сакаат сигурноста од слободата, но сигурност без слобода застрашува“, вели Мухиќ.

Според писателот Луан Старова литературата е чувар на идентитетот, но таа во Македонија се повеќе ја губи својата позиција, а писателите се маргинализирани. Старова смета дека македонските интелектуалци како и интелектуалците од другите земји во транзиција, не се снашле најдобро и го немаат зачувано својот идентитет. Денес отсуствува интелектуалната критика, смета Старова.

Според професор Стефан Влахов Мицов интелектуалците на Балканот се тесно поврзани со политиката, што всушност   ги прави државни а не независни интелектуалци кои размислуваат слободно и со своја глава.

Охридската ПЕН конференција со работа продолжува викендов кога ќе се одржи и состанокот на Комитетот за превод и јазични права.