Средното економско училиште ќе стане посебна образовна установа во Охрид, односно повеќе нема да биде под административна управа на Гимназијата Св. Климент Охридски. Иницијативата за отпочнување на постапката за издвојување на економските стручни паралелки од Гимназијата, ја донесе Советот на Општина Охрид на 17-та седница, што се одржа вчера.
Одлуката за издвојување на Економското училиште од Гимназијата треба да ја потврди Министерството за образование и наука.
Покрај оваа новина, советниците усвоија повеќе извештаи за реализација на годишните програми од урбанистичката и комуналната сфера, како и од сферата на туризмот кои биле реализирани во првото тромесечије од оваа година. Исто така беа усвоени и извештаите за работата на општинските јавни претпријатија, како и повеќе локални плански документации. Најголема расправа советниците отворија по првата точка, во кој се усвои извештајот за остварување на буџетот.
Помеѓу поважните одлуки, кои ги донесе Советот на Општина Охрид е и одлуката за основање на Јавно претпријатие за изградба, одржување, реконструкција на локални патишта и хидротехнички објекти „ Нискоградба“ Охрид. Советот даде зелено светло за Елаборатот на комисијата за проценка на штетите од неодамнешните поплави, а усвоена беше и Годишната програма за поставување урбана опрема во општинаta.
