Тренерот на Атлетико Мадрид, Диего Чоло Симеоне, не е изненаден од интересот на Челзи за неговиот напаѓач Диего Коста. Весникот „As“, неодамна објави дека Челзи е подготвен за Диего Коста да плати сума од 60 милиони евра, а Симеоне изјавил дека нема да го спречи напаѓачот доколку тој реши да го напушти клубот.
„Сè зависи од Диего Коста, односно каде тој ја гледа својата иднина. Ќе ја поддржам секоја негова одлука“, рекол тренерот на лидерот во шпанското првенство.
Менаџерот на Челзи, Жозе Мурињо, неодамна јавно кажа дека не е задоволен од играта на нeговите напаѓачи, пред сè од Фернадо Торес.
„Нормално е што Челзи се интересира за Диего Коста, тој за нас претставува и голем економски потенцијал. Самјуел Ето е веќе во години, а Челзи смета дека Коста е вистинскиот играч за нив. Сепак, во моментов тој е играч на Атлетико“, рекол Чоло Симеоне.
Според прогнозите Фернандо Торес од Челзи ќе се пресели во Атлетико, клуб во кој ја започна кариерата и од каде замина во Премиер лигата. Интерес за Торес покажува и Интер.
Диего Коста, кој неодамна дебитираше за шпанската репрезентација, во досегашниот дел од сезоната на 45 натпревари постигна 34 голови.
„Макфакс“
