На 1108 метри надморска височина, на половина час пешачење над селото Елшани, вчера, во месноста Палајца, беше возобновен и осветен параклисот на црквата Свето Богојавление.
Пред присутните верници богослужеше парохискиот свештеник Атанас Казанџиски кој по чиноначалствувањето укажа на потребата од единство во верата и на верба во единствениот праведен божји пат на кој се среќаваме со радоста и духовната чистота и духовното просветлување: ”Еден таков чин е и градењето на црквите, а црквата тоа е народот, тоа се луѓето кои ја полнат со своето присуство и кои со Бога во себе градејќи црква, ја градат светлата иднина и се изградуваат себеси како здрави и силни позитивни личности полни со доблесни особини.”-беше истакнато на богослужбата.
На осветувањето на параклисот Свето Богојавление присуствуваа повеќе од стотина верници од Елшани, меѓу кои и членовите на семејството Трајаноски кои се и ктитори на овој христијански православен храм, еден од повеќето кои се наоѓаат во атарот на селото Елшани. Меѓу присутните имаше и верници од Пештани.
Во името на ктиторот, сите присутни беа поканети на трпезата крај параклисот и беа почестени со сендвичи и пијалок. Инаку, просторот околу параклисот на Свето Богојавление од страна на ктиторите е преуреден во убаво и примамливо излетничко место кое сигурнои ќе привлече многу верници и љубители на природните убавини да го посетат овој мал христијански храм и оттука да уживаат во глетката пред која се протега Елшани и крајбрежието на Охридското Езеро.
Погледот од светото место над Елшани
фото:Дим Дон