За селекцијата на Хрватска трет пат непремостлива пречка е полуфиналето на Европските првенства. На еврособирот во Данска, домаќинот со 29-27 ја совлада Хрватска и против Франција ќе го бранат златото освоено пред две години во Србија.
Селекторот на „коцкастите“, Голужа на пресконференцијата по мечот вината за елиминацијата ја побара во судиската двојка – Иако велев дека нема да го коментирам судењето, јас не можам да издржам – судењето беше понижувачко. Данска направи се за да го освои тука златото. Се беше подредено за да се случи тоа. Ние дури вчера успеавме малку да отспиеме. Живеевме како животни, во три града. На ваквите обвинувања дрско возврати домашниот селектор Вилбек – Ова не е фер-плеј. Ние не зборувавме за судиите кога игравме на првенството во Хрватска. Немам присуствано на полоша пресконференција.
По смирувањето на страстите хрватскиот селектор Голужа се извина, а мала утеха неговите избраници ќе бараат во мечот со Шпанија за третото место.
Мх.П.
