ЕУ: Во Виена ќе се спасува договорот од Пржино

Спас и почитување и имплементација на договорот од Пржино, а не постигнување нов договор за излез од политичката криза во Република Македонија. Ова ќе биде целта на новата лидерска средба на првите луѓе на четирите најголеми политички партии ВМРО-ДПМНЕ, СДСМ, ДУИ и ДПА што во организација на еврокомесарот за преговори за проширување Јоханес Хан и тројцата европратеници Иво Вајгл, Ричард Ховит и Едвард Кукан во петок (22-ри април) ќе се одржи во Виена, јави дописникот на МИА од Брисел.
 
Запрашана зошто Виена, а не Брисел или Скопје е избрана за место на преговори и дали Хан со Никола Груевски, Зоран Заев, Мендух Тачи и Али Ахмети ќе разговара за постигнување нов договор и каков е планот на ЕУ за преговорите в петок, портпаролката на Европската комисија, Маја Коцијанчиќ истакна дека целта е спас на договорот од Пржино.
 
– Би рекла зошто не Виена? Можам да кажам дека е добро познато дека е испратена покана-писмо во име на комесарот Хан и тројцата европратеници посветени во ова прашање за состанок со политичките лидери од БЈР Македонија што треба да се случи во Виена овој петок на 22 април. Целта на состанокот е да се дискутира за начините за решавање на кризата и да се обезбеди дека лидерите ќе продолжат со имплементација на договорот од Пржино и со реформските приоритети за да покажат волја д аја вратат земјата назад на евроатлантскиот пат и тоа одговара втор дел од прашањето во одно сна самио договор, истакна Коцијанчиќ.
 
Според информациите од Еврокомисијата, иако се уште не е избрано точното место каде ќе се одржи состанокот во главниот град на Австрија, се шпекулира со седиштето на ЕУ-делегацијата во Виена или во седиштето на ОБСЕ. Единствено е познато дека состанокот в петок ќе започне во 11 часот и се очекува да трае долго поради претходното искуство на сите засегнати при ваквите преговори во минатото.

OhridNews
^{Извор:„МИА“}