Како се доближува денот на изборите во соседна Бугарија, така се поголеми и поотворени стануваат провокациите од тамошните политичари кон Македонија и македонскиот народ. Најдалеку отиде европратеникот Ангел Џамбаски кој во предизборен видео спот го припои Охрид на Бугарија и ја негира реалноста и постоењето на македонска држава.

Заменик-претседателот на бугарската ВМРО-БНД Џамбаски во објавата на Фејсбук со кадри од Охрид, Скопје и други локации од државава наведува дека „Македонија е бугарска, а Бугарија е над се“.

Постојат причини кои се поголеми од сите и од било што. Од секоја политичка ситница. Поголем од која било злонамерна политичка тема. За мене, за нас од ВМРО – таква кауза е Македонија. Македонија на оние Бугари кои ја сакаат, кои ја наследија и кои никогаш не ја заборавија. На Бугарите кои живеат во Македонија. Македонија на оние Бугари кои ја изградија модерна Бугарија. Колку пострашно ја измислувате вашата нова лажна историја, толку погласно ќе се уриваат, лажните темели што сте ги изградиле вашата патетична сегашност ќе се распаднат. Колку похистерично ја мразите Софија, толку побугарски Охрид останува. Колку погласно ги врескате лагите, толку побрз и поужасен ќе ви биде крајот, пишува Џамбаски во објавата.

Спотот на Џамбаски предизвика лавина реакции во македонската јавност. Реагираше и Министерството за надворешни работи (МНР), кое денеска преку Амбасадата на С. Македонија во Бугарија до бугарското Министерството за надворешни работи упати протестна нота во врска со објавено видео на пратеникот во Европскиот парламент од Бугарија и заменик-претседател на политичката партија ВМРО-Бугарско Национално Движење, Ангел Џамбаски.

Според Министерството за надворешни работи, ваквите изјави не придонесуваат во напорите за продлабочување на пријателството, добрососедството и соработката меѓу двете земји.

Реторика во која се изразуваат територијални претензии кон соседите не доликува на земји-сојузнички во НАТО и земја-членка на Европската унија, што е директно и спротивна на идеалите и вредностите на Европската унија, на кои и двете земји силно се посветени, се вели во соопштението на МНР.

Од МНР вечерва соопштија дека ќе известат и соодветно ќе реагираат до институциите во Европската унија.

OhridNews