Екологистот Лазо Наумоски, кој неодамна изработи проектот за спас на пастрмката од истребување, смета дека на езерото не му е потребен концесионер, минимум до 2014 година, додека трае забраната за лов на пастрмката. Според него, овој период, Хидробилошкиот институт треба да го искористи за да изготви студиозни анализи за состојбата со рибниот фонд.
– Додека не се направи студија не може да се зборува за давање на Охридското езеро под концесија. За исчезнувањето на пастрмката, сметам дека имаше големо влијание и претходниот концесионер кој при ловењето ги користеше висечките мрежи, вели Наумоски.
Тој смета дека со езерото најдобро би било кога би стопанисувале локалните власти од градовите Охрид, Струга и Поградец кои се наоѓаат на брегот на езерото.
Ваквото мислење на Наумоски е спротивно од неодамна изнесеното од страна на дел од експертите кои учествуваа на тркалезната маса посветена на Охридското езеро. Според нив, езерото што поскоро треба да се даде под концесија со цел да добие свој стопан кој ќе се грижи за овој природен ресурс.
OhridNews
