Брзината со која ние ги трошиме изворите на необновлива енергија е многу пати поголема од брзината на нивното создавање, затоа порано или покасно тие ќе бидат исцрпени. Зголеменото користење на необновливи извори на енергија нанесува голема штета на животната средина.  Поради тоа искористувањето на обновливите извори на енергија и нивната примена во широк дијапазон,со цел заштита на животната средина, се една од најактуелните теми на глобално ниво.


Ова е темата на која расправаа учесниците на работилницата која се одржа изминатите денови во просториите на Факултетот за Електротехника и Информациски Технологии . Учествуваа дванаесет членови на локалните комитети на ЕЕСТЕЦ во цела Европа, како и студенти од охридскиот факултет кои покажаа голем интерес за овој семинар.

Целта на семинарот беше учесниците да се запознаат со напредните технологии во обновливите извори на енергија и енергетската ефикасност. За таа цел, беа ангажирани најдобрите професори, експерти од индустријата и членови на Македонската Академија на Науките и Уметностите.


Според експертите, географската позиција на Македонија е поволна за  користење на сончевата енергија како извор на топлина. Мерењата покажале дека во текот на целата година климата дозволува да се произведува енергија од сонце.

OhridNews