Поранешниот член на ВМРО-ДПМНЕ и на Обединети за Македонија, Филип Петровски денеска во Скопје со група приврзеници и симпатизери донесоа одлука за основање на партијата Демократска Десница (ДД).

За претседател на иницијативен одбор на партијата едногласно беше избран Филип Петровски, кој пред присутните ги образложи мотивите за основање на партијата, а говореше и целите и задачите на новата партија.

 „Одлуката за основање на партијата е израз на дадениот политичкиот момент и е израз на потребата на македонскиот граѓанин да се направат промени кои може да доведат до подобар квалитет на животот“, рече Петровски.

Според него политичкиот систем во државата е блоковски поделен, узурпиран и отуѓен од граѓаните.

„Граѓанинот е на маргините, колективитети доминираат, ставајќи го поединецот во неможност да ја менува живеачката. Ние велиме доста е! Време за нешто ново.“, порача Петровски.

Тој се пожали дека многумина граѓани, иако ја поддржувале Демократската Десница, не се решиле да и пристапат, плашејќи се да не ги загубат своите работни места во администрацијата, а оние што имале приватен бизнис, се плашеле од инспекции.

„За тоа ли го рушевме комунизмот, за да нашите луѓе се плашат да основаат политичка партија и да имаат свој став“, рече Петровски.

ДД е граѓанска партија со десничарска ориентација, која е основа на заедничкото дејствување на сите нејзини членови без оглед на религиозна, полова и етничка припадност.

Меѓу главните приоритети на партијата се демократскиот развој и социјалниот просперитет на државата, нејзино зачленување во ЕУ и НАТО, воздигнување на достоинството и духовните вредности, функционирање на правната држава, слобода на говорот, градење добрососедски односи и обезбедување на економско-социјална сигурност.

“извор Макфакс“
Ohridnews