Фудбалскиот клуб Металург изнесе тешки обвинувања за судењето на натпреварот одигран со Напредок, наведувајќи дека можеби станува збор за одредена завера. Во соопштението до нашата редакција се вели:

“Сакаме да ја информираме македонската јавност дека на стадионот Железарница фудбалската публика беше сведок на едно срамно и тенденциозно судење со задни намери.

Главниот судија Александар Ставрев на натпреварот Металург-Напредок своето скандалозно судење го започна уште во втората минута, кога сосема непотребно го исклучи домашниот фудбалер Музафер Ејупи за безопасен старт на центарот на игралиштето.

Но, тоа како да не му беше доволно, продолжи со провокативното судење, со една цел да ги изиритира домашните фудбалери, со очигледна намера, чија позадина набргу ќе излезе на видело. До 28 минута тој додели уште два црвени картони за домашните играчи.

Дали ваквото судење им оди на рака на гласините кои последниве денови беа особено силни, дека наводно еден натпревар од македонското првенство е ставен во игра од меѓународната обложувачка мафија? Можеме само да претпоставуваме. Колку за илустрација, коефициентот за пораз на Металург беше исклучително висок.

За жал, со ваквата арбитража, Металург е ставен во незавидна ситуација, па како императив се поставува прашањето: Дали има смисла и натаму да се инвестира во македонскиот фудбал?

По ваквиот исход веќе од денеска Металург ќе бара одговор од највисоките инстанци на Фудбалската федерација, да ги преиспита сите негови чинители, и да гарантира регуларно првенство, инаку во друг случај натпреварувањето во ваква лига станува бесмислено.

За почеток бараме целосно изземање на судијата Ставрев, а ова барање ќе го доставиме и до ФФМ во писмена форма, се вели во соопштението на ФК Металруг.

Ohridnews