За прв пат во фудбалската историја репрезентацијата на Шпанија го освои најдрагоцениот трофеј во светот. Но покрај неа на Светското првенство блеснаа бројни играчи кои ги освоија индивидуалните награди, а најпрестижната заврши во рацете на уругвајскиот херој – Диего Форлан. Тој е избран за најдобар фудбалер на штотуку завршеното Светско првенство во Јужна Африка.
Диего Форлан
Добитникот на Златната топка на Адидас, Диего Форлан, остави најсилен впечаток на Мундијалот. Феноменалната десетка го одведе Уругвај на чекор до големото финале, а за целосна сензација му недостигаше среќа која најсилно дуваше во грбот на шпанската фурија. Форлан ја освои престижната награда пред Весли Снајдер од Холандија и новото златно момче на Шпанија, Давид Виља.
Давид Виља – Шпанија Весли Снајдер – Холандија
Германецот Томас Милер има причина за тројно задоволство. Откако со „панцирите“ триумфираше во малото финале ги приграби и наградите за најдобар стрелец на Светското првенство (5 гола и 3 асистенции – Златна копачка на Адидас) и за најдобар млад фудбалер, што ја доделува Хјундаи. Сребрената копачка ја освои шпанецот Давид Виља ( 5 гола 1 асистенција), а бронзената холанѓанецот Весли Снајдер( 5 гола 1 асистенција).
Томас Милер – Германија Икер Касилјас – Шпанија
Наградата „Златни ракавици“ за најдобар голман заврши кај капитенот на златната репрезентација, Икер Касилјас.
Г. Момироски
