Попладнево, пропратено со традиционални обичаи и богослужба во црквата „Св. Никола Ѓеракомија“, се изврши примопредавање на кумството за големиот празник Богојавление – Водици.
Новите кумови, градоначалникот Никола Бакрачески и неговиот пријател, охридскиот бизнисмен Сашо Симески, го презедоа кумството од минатогодишниот кум, Стојан Ѓоргоски.
– Чинот на свеченото предавање на кумството е една од најголемите духовни вредности со која можат да се закитат новите кумови и еден од најрадосните момент во животот на еден охриѓанец и македонец. Воедно наша обврска е овие мигови да ги споделиме со граѓаните, роднините, пријателите, обрска да ги споделуваме хуманите, моралните и етички вредности и да шириме позитивна енергија меѓу верниците, рече новиот кум на манифестацијата, градоначалникот Бакрачески.
Минатогодишниот кум, Стојан Ѓоргоски упати честитки до новите кумови.
– Им посакувам здравје, берикет, успех во работата и воедно упатувам благодарност до здружението „Богојавление“ за успешната организација, изјави Ѓоргоски.
Новите кумови и членовите на здружението „Богојавление“ информираа дека подготовките за одбележување на празникот се завршени и дека во недела, на градското пристаниште, се очекува рекорден број на охриѓани и гости кои ќе го проследат чинот на фрлањето на светиот крст во водите на Охридското езеро.
Т.К.
