Фото галерија: Доделени медалите на храбрите маратонци кои пливаа во тешки услови на 38. издание на Охридскиот пливачки маратон

Почнаа со сонце завршија во бранови какви што охриѓани не паметат последните децении. Шеснаесет храбри пливачи го започнаа Охридскиот маратон во Свети Наум, еден се откажа порано, а останатите по 4,5 часа минати во вода беа принудени за прв пат во историјата на манифестацијата да ја прекинат трката поради големо невреме што го зафати Охридско-струшкиот регион кое беше проследено со силен ветар, високи бранови, дожд и електрични празнења.

Нивниот спортски напор има специфична тежина поради лошите временски услови, дотолку што дел од нив беа подготвени да ја продолжат маратонската трка која беше прекината од безбедносни причини. Во нивна чест вечерва во хотелот „Милениум Палас“ во Охрид претседателката на државата Гордана Сиљаноска – Давкова приреди прием на кој беа врачени медалите на најуспешните пливачи на 38 издание на Охридскиот пливачки маратон.

Согласно пропозициите, водечките во моментот на прекинувањето на трката се и победници на маратонот. Во машка конкуренција тројца пливачи имаа исто време и беа прогласени за победници: Матео Фурлан и Федерико Тамборино од Италија и аргентинецот Матијас Диас Хернандес.

Во женска конкуренција водечка во времето на прекинот беше Мајте Ајлен Пука од Аргентина, второпласирана беше нејзината сонародничка Ерика Јенсен, а трета Милица Љубисављевиќ од Србија. Наградите на најуспешните во машка и женска конкуренција ги врачија претседателката Сиљаноска-Давкова, градоначалникот на Охрид Кирил Пецаков, претседателот на градскиот совет Перчо Божиноски и претставници на организаторот, ПК Охридски бранови 2008, на Пливачката асоцијација на Македонија, спонзори и помагатели.