Голем број верници денес присуствуваа на црковно-народниот собир кој се одржа пред малата црквичка во Лагадин посветен на великомаченичките Св. Софија, Љубов, Вера и Надеж, а по повод денешниот празник.
Беше одржана богослужба, а традицијата е на овој ден да се осветат празничната софра и вода. Бројните граѓаните трпеливо чекаа во редици да запалат свеќа. 
Малата црква во Лагадин посветена на Св. Софија, Љубов, Вера и Надеж, во 2000 година ја изгради охриѓанецот Љупчо Патче, кој средствата кои се собираат во црквата на овој ден ги донира во хумани цели.
Во својот богослужбен циклус, Црквата на овој ден се сеќава на животот и мачеништвото на четири римјанки Вера, Надеж, Љубов и нивната мајка Софија. Овие четири христоподобни души беа приведени од римските власти за време на прогоните на императорот Хадријан, во првата половина на вториот век по Христа.
Заради исповедањето на Христа и одбивањето да принесат жртви пред празниот идол на Артемида, Вера, Надеж и Љубов беа ставени на маки пред очите на нивната мајка и најпосле им беа отсечени главите. Софија ги зеде и ги закопа телата на своите три ќерки и откако помина три дена и ноќи во молитва над нивниот гроб, го предаде својот дух на Бога.
Во Лагадин одбележан празникот Св. Маченички Софија, Љубов, Вера и Надеж
Н.С.Ј.
фото. Г.М.
