– Особено ми е драго што традицијата продолжува па и на ова, 51-во издание на фестивалот Охридско лето ќе се одржи француска вечер, со што продолжува успешната соработка на фестивалот со истакнати уметници од Франција. Чест ми е што оваа година, ќе настапи ансамбл од Тулуз, кој што е основан во 1953-та година досега има остварено над 5.700 концерти во повеќе од 30 земји ширум светот, настапувајќи со познати инструментални солисти и вокални групи на реномирани фестивалски и концертни подиуми– вели музичкиот селектор на фестивалот Гордана Јосифова Неделковска.
Репертоарот на Камерниот оркестар од Тулуз опфаќа широк период од Барок до музиката на 20-от век, вклучително и најнови дела напишани специјално за неговите програми.
Со ансамблот ќе диригира маестро Жозеф Андре кој истовремено ќе настапи и како солист на виолина. Бројните награди на меѓународни натпревари и настапи насекаде низ светот зборуваат за неговото богато музичко искуство.
– Среќни сме што ќе настапиме на најреномираниот фестивал во Македонија, во градот за кој што сме слушнале дека наликува на нашето Сен Тропе. Чест ни е што ќе бидеме дел од „Охридско лето“ и што ќе оставиме белег во музичката историја на фестивалот – изјавувија членовите на ансамблот.
Љубителите на француската музика и камерното музицирање ќе можат да уживаат во концертот на Камерниот оркестар од Тулуз во црквата Св. Софија со почеток во 21 часот.
