Факултетот за туризам и угостителство во Охрид е домаќин на првата „Германско-македонска конференција за одржлив туризам”, која треба да даде увид во туристичкиот развој на Македонија.
Конференцијата што ќе се одржи на 23 мај, ќе ја отвори раководителот на секторот за меѓународни односи при Германската сојузна фондација животна средина д-р Улрих Вите.
Факултетот за туризам и угостителство во Охрид и германскиот Универзитет за применети науки „Еберсвалде“ од октомври 2011 соработуваат на „Германско-македонската тренинг програма и мрежа за одржлив туризам”. Овој прв заеднички проект финансиски е поддржан од Германската сојузна фондација за животна средина. Првата тренинг обука започна вчера во Охрид и ќе трае до 24-ти мај.
На конференцијата закажана за 23-ти мај туристички проекти ќе претстават меѓу другото преставници од Германското здружение за интернационална соработка, од Германската амбасада во Скопје и од Локалната агенција за развој Струга.
На тренинг обуките учество ќе земат професори од ФТУ како и други актери во нашиот туризам од државни институции но и од приватниот сектор во Македонија. Релевантните туристички теми ќе ги презентираат професори од мастер студиската програма „Менаџмент за одржлив туризам” на германскиот партнер универзитет.
Целта на проектот е креирање на германско-македонска мрежа. Во тој контекст наредната тренинг сесија на проектот ќе се одржи на крајот на август оваа година во Берлин и Бранденбург. Тогаш ќе биде организирана и втората Германско-македонска конференција за одржлив туризам на Универзитетот за одржлив развој Еберсвалде во Германија.
Во рамки на оваа двегодишна германско-македонска соработка треба да се обучат најмалку 10 промотори за одржлив туризам кои стекнатото знаење ќе можат да го пренесат теоретски во студиските програми и наставата на Факултетот за туризам и угостителство во Охрид односно практично при своето туристичкото делување во Македонија.
