Германија ја совлада Португалија со 1-0 во мега пресметката од групата на смртта. Натпреварот беше затворен, без многу шанси и воопшто не ги оправда очекувањата на милионскиот аудиториум ширум светот.
Германците го диктираа темпото но не успеваа посериозно да го загрозат противничкиот гол. Најблизу до погодок во првиот дел беше Пепе, кој успеа да ја погоди гредата на голот на Нојер.
Одлучувачкиот момент се случи во 72 минута од мечот кога по центрашутот на Сами Кедира, Марио Гомез со глава ја затресе мрежата на Патрисио.
Дури по примениот гол се разиграа “европските бразилци“. Нани го погоди дирекот на голот на Нојер, кој неколку минути подоцна одлично интервенираше по ударот на Варела.
Во втората рунда Германија игра против Холандија, додека Португалија првиот триумф ќе го брка против Данска.
М.П.
