Гостите од Белгија дочекани со торта и македонски вина

Првите 90 белгиски туристи за оваа сезона, синоќа допатуваа во земјава. Со првиот редовен лет на авиокомпанијата „Џетерфлај“ од Белгија 68 од нив слетаа на скопскиот аеродром „Александар Велики“, а останатите белгиски туристи слетаа на охридскиот аеродром  „Св. Апостол Павле“. Со првиот лет на „Џетерфлај“ од Македонија одлетаа 57 патници.

На туристите кои допатуваа во Скопје и на екипажот на воздухопловот Боинг 737-500 топло добредојде им посака генералниот менаџер на „ТАВ Македонија“, Зоран Крстевски, почесниот конзул на Белгија, Елена Никодиновска, заменик-генералниот менаџер за маркетинг на „ТАВ Македонија“, Зафер Меше, менаџерот на аеродромот „Александар Велики“ во Скопје, Неџат Курт, како и персоналот на аеродромот „Александар Велики“. Патниците и членовите на екипажот беа послужени со торта и квалитетни македонски вина.

– Со компанијата „Џетерфлај“ и новата линија со Брисел, граѓаните на Македонија добиваат уште едно значајно поврзување со една од за нас позначајните европски дестинации – рече Крстевски.

Белгиската авиокомпанија до септември ќе има редовни летови секој вторник и недела од Брисел до охридскиот аеродром „Св. Апостол Павле“ и до скопскиот аеродром „Александар Велики“. „Џетерфлај“, заедно со уште седум други авиокомпании, е дел од најголемата туристичка флота во Европа, во рамки на „ТУИ Травел ПЛЦ“ групацијата, која веќе започна со туристички аранжмани и оствари летови до Македонија, носејќи туристи од државите на Бенелукс со првиот лет од Холандија на крајот на април.