Градоначалникот Никола Бакрачески вечеравечер во гинеколошкото оделение при ЈЗУ Општа Болница го посети првото родено бебе во Охрид за 2015–та година, Илија Прангоски што на свет пристигна вчера попладне.
Градоначалникот Бакрачески го даруваше малиот Илија со 10.000 денари и посака да биде здраво, среќно и бериќетно во животот што му претстои.
-Ова е првата среќна вест во Новава 2015-та Година која не израдува сите нас. Ако по првиот ден се познава каков ќе биде текот на целата година тогаш очекуваме таа да ни биде пред се здрава, весела и бериќетна. Би сакал рожбите годинава да бидат многу почести во однос на минатата година и да се множат повеќе деца. Упатувам честитки до родителите и посакувам новороденчето во текот на целиот живот да го следи добро здравје, да биде среќно и бериќетно и догодина да добие братче или сестриче, изјави градоначалникот Бакрачески.
Д-р Ѓоко Танески истакна дека новороденчето и мајката Маја се во одлична здравствена состојба.
-На нашето оделение на 1-ви јануари во 17 часот и 40 минути се роди првото дете во оваа година кое е машко и е здраво. Бебето е тешко 3 килограми и 600 грама и долго 51 сантиметар. Се роди по природен пат. Мајката и детето се чуствуваат добро, истакна Танески.
Инаку општина Охрид од минатата година максимално се ангажира и го поддржува наталитетот во Охрид. Врз основа на доставениот список од ЈЗУ Општа Болница, а по претходно потпишаниот меморандум за соработка меѓу општината и оваа здравствена установа, Локалната самоуправа во секој месец трансферира по 5.000 денари еднократна парична помош за новороденче кое се родило во Охрид. Од почетокот, односно од месец јануари 2014 до денес оваа парична помош е доделена на 385 мајки од Охрид, односно по овој основ општината исплатила 1 милион 925 илјади денари.
OhridNews
