Според Министерот за информатичко општество и администрација Иво Ивановски, на првиот конкурс кој беше наменет за 50 електронски продавници, аплицирале само 32 бизнис планови. „Свеста во државава за електронските продавници е неизградена. Се уште владее чувството на страв од можен криминал и злоупотреба на податоците. Но тоа не е точно, ниту логично.“ – вели ресорниот министер.
Ивановски ги охрабрува сите заинтересирани лица да се пријават на новиот оглас, што од наредната недела ќе биде јавно објавен. „Македонија има развиено информатичко општество и затоа во секој бизнис може да се постават електронски продавници, кои ќе бидат конкурентни на западноевропските земји. Наредната недела ќе се објави нов конкурс за 50 компании, кои ќе можат да отворат свои интернет продавници. Компаниите преку нив, би ги пласирале своите производи низ целиот свет“ – додава министерот.
Инаку, втората електронска продавница во земјава деновиве и официјално беше промовирана во Охрид.
