До 3-ти декември, македонските граѓани ќе можат да испраќаат предлози за тоа кој кириличен домеин најадекватно би ја претставувал земјава во меѓународниот интернет простор. Новиот национален кириличен домен ќе им овозможи на македонските граѓани, да го користат интернетот на своето македонско кирилично писмо.
Според македонската академска истражувачка мрежа МАРнет, домеинот ќе мора да го означува името на земјава и нејзините специфични карактеристики. „Предлозите кои ги исполнуваат критериумите за да станат интернационален домеин, ќе бидат ставени на гласање на веб порталот на МАРнет. По завршување на гласањето, предлогот со најголем број гласови ќе биде ставен во официјалното барање за започнување на процесот за добивање на врвниот кириличен домеин за државава“ – истакнува директорот на МАРнет, Сашо Димитријоски.
Инаку, досега само четири земји имаат воведено кириличен домеин во интернет просторот. После Русија, Србија, Казахстан и Монголија, Македонија ќе биде петтата земја која ќе има кирилична верзија на домеин.
OhridNews
