Купишта отпад за чие транспортирање е потребен камион, деновиве се подигаат од брегот на езерото. Големите бранови на површина повторно ја исфрлија сета негрижа и недостаток на совест на жителите околу бисерот на Балканот, Охридското езеро.

За жал бројните апели на екологистите, вљубениците во природата и сите кои имаат развиено совест и почит кон природата, не помагаат. И брановите и акциите на нуркачите за чистење на дното на езерото не можат да исчистат онолку колку што луѓето можат да фрлат и загадат.    

Од акцијата на нуркачите за чистење на езерото

Дополнително проблемот го зголемува и очигледно ниската свест на граѓаните од другата страна на езерото, од кај нашиот сосед, бидејќи стручните лица сметаат дека голем дел од отпадот доаѓа токму од таму.

Загадени се и реките од сливното подрачје кои целосно ја девастираат флората и фауната во езерото. Овие слики укажуваат дека реката Сатеска носи се со себе- секаков вид на отпадоци, но и тиња и речна песок која навлегува и се шири на стотици метри квадратни, можеби и повеќе, загрозувајки ја еколошката рамнотежа на езерото.

Од Центарот за развој на југозапдниот регион потенцираат дека од нивна страна со години се иницира и зборува за разбработка на некој проект за решавање на овие проблеми.

– За жал нема особен интерес од општините кои директно треба да се вклучат во решавањето на проблемите што ги носи Сатеска, а тоа, пред се, се однесува на Охрид, Дебрца и Струга. Ништо поразлична не е сликата и со другите реки: Далјан и Сушица, како и помалите водотеци кои од Петрино и Галичица навлегуваат во езерото, велат од центарот.

Тука е и проблемот со колекторскиот систем кој години наназад не функционира, а владата најави дека ќе ја преземе обврската. Како што неодамна истакна градоначалникот Јован Стојаноски, станува збор за еколошка бомба и серизона опасност.

– Изработивме проект кој ќе го доставиме до владата со барање за решавање на колекторскиот систем. Имаме разговарано со меѓународни фондации кои се подготвени да излезат во пресрет и финансираат. Пак ќе разговараме со премиерот и се надевам дека конечно ќе има решение, изјави Стојаноски кој најави дека во текот на март ќе бидат разгледани и неколку проекти поврзани со екологијата со чија помош ќе се решат бројни проблеми.

Останува да се чека на реализација на ветеното и тоа да биде што поскоро за да не се уништи она што со векови пред нас опстојувало. Во меѓувреме подигањето на еколошката свест да биде меѓу приоритетите на општините и во образованието.

Т.Кувенџиска