Ракометарите на Охрид го совладаа актуелниот првак на Македонија Еурофарм Пелистер со 31:26 во финалето на Меѓународниот меморијален турнир „Крсте Андоновски“, што се одигреа вечерва во прекрасен амбиент во исполнетата спортска сала „Билјанини извори“.
Двете екипи иако се во подготвителен период, одиграа одличен натпревар, со многу жар и борба за што беа наградени со громогласни аплаузи од публиката која уживаше во ракометната претстава. „Гладијаторите“ имаа водство во најголем дел од натпреварот, а на голот го имаа и одличниот Бојан Блажески кој беше прогласен за играч на финалето.
Блажески се најде и во идеалниот тим на турнирот заедно со уште двајца соиграчи, крилото Ѓукиќ и бекот Иванковиќ кој беше прогласен за најдобар играч на IV издание на Меѓународниот турнир „Крсте Андоновски“.
Пехарот на победничката екипа и го врачи градоначалникот на Охрид Кирил Пецаков, кој е покровител на турнирот
Во Ол стар тимот на турнирот уште се и левото крило на Тримо Требње – Марко Мајсторовиќ, средниот бек на Еурофарм Пелистер – Павле Атанасијевиќ, неговиот соиграч Анжеј Видомски кој е прогласен за најдобар десен бек, дпивотот Илија Богдановиќ.
Најдобар стрелец на турнирот е десното крило на Партизан, Лазар Анѓелковиќ, кој постигна 26 погодоци.
Ова е прв триумф на Охрид на турнирот што го организира заедно со Општина Охрид што, пак, е одлична најава за претстојната ракометна сезона.
Фото галерија:
Г.М.
Фото: А. Момироска
