Македонскиот премиер Никола Груевски упати телеграма со честитка по повод освојувањето на златниот медал и поставувањето светски рекорд на македонската параолимпијка Оливера Наковска Бикова.

Во петокот, 31-ви август македонската параолимпијка на игрите во Лондон, Оливера Наковска-Бикова, го освои златниот медал, во дисциплината 10 метри воздушен пиштол, а притоа постави и нов Параолимписки рекор

„Со големо задоволство и радост ја примив веста за Вашиот голем успех, и за постигнатиот светски рекорд и освоеното прво место во најсилната конкуренција на параолимписките игри“, се наведува во честитката од премиерот Никола Груевски.

Груевски, заблагодарувајќи и’ се Наковска-Бикова во името на граѓаните и Владата на Република Македонија, и од свое лично име, изрази „голем почит за Вашето огромно достигнување и благодарност од името на целата нација за промоцијата на нашата земја Македонија. Вие сте хероина на нашата земја, а македонските граѓани заедно со Вас се радуваат и го слават Вашето дело“

Премиерот изразува во телеграмата и големо почитување за вложениот труд, знаење и вештини на македонската спортистка чиј резултат постигнат во Лондон сигурен е еден од најсветлите моменти за македонскиот спорт.

„Првото место на параолимписките игри и постигнатиот светски рекорд, се резултат на Вашата посветеност, неуморност, верба и квалитет, и во исто време тоа е најдобар пример како се претставува националниот дрес и се промовира Татковината. Вие, Оливера, се запишавте не само на светлите страници на нашиот спорт, туку и на страниците каде се бележат личностите кои постигнале најголеми достигнувања на светско ниво, и треба да уживате во Вашиот успех, постигнат како резултат на сопствените вредности“, се вели во телеграмата од премиерот Груевски.

Додава дека ваквите успеси се и причина повеќе „Владата да продолжи со поддршка и инвестиции во спортот, и да работи на унапредување на условите за развој на спортистите и на нивните резултати и постигнувања“.

Греувски во оваа пригода посакувајќи и’ на Наковска-Бикова нови успеси, не ја испушти можноста да им честита на големиот успех и на другите членови на македонската олимписка делегација во Лондон.

Премиерот, исто така, упати и покана за лична средба по завршувањето на Игрите, на која ќе „ги споделиме впечатоците и идеите за понатамошните движења кон новите цели и успеси“, вели Груевски

“макфакс“
Ohridnews