Претседателот на ВМРО-ДПМНЕ Никола Груевски упати честитки по повод Големиот Православен празник Велигден.

-Да се помолиме на нашиот милостив Бог и да му се заблагодариме на неговата закрила кон нас луѓето. Исус го презеде гревот човечки и за навек го задолжи човештвото да размислува и да го разликува доброто од злото, го задолжи секој поединец да размислува со љубов, да сака со срце, да прави добри дела и да се покае за грешките. Да се заблагодариме на Бога за неговата милост и со радост да ја примиме веста за воскресението Христово. Да се помолиме на Бог и да си посакаме и во иднина да биде блиску до нас, до нашиот народ, до нашата татковина. Нашиот народ низ годините има поминато многу тешкотии и искушенија, успеал да преброди многу грешни човекови дејанија. Нашиот Бог и вера биле отсекогаш со нас да нè поткрепат и утешат кога било потребно. Токму затоа, да бидеме благодарни, да се радуваме на Велигден и да си посакаме божја поткрепа и во иднина.  Нека Бог нè чува и биде со Македонија, да си го зачуваме она што е наше и она што нам ни припаѓа. Нека Бог ни помогне во сите искушенија, нека го зацврсти единството помеѓу народот, нека ја умножи љубовта и нека го одврати секој оној кој крева рака врз другиот. Нека нè избави од насилство и неред, нека нè потхрани со мир и спокој, напиша меѓу другото Груевски.

По повод празникот честитка до верниците од православна вероисповед упати и претседателот на СДСМ Зоран Заев.

-Во миговите на искушенија, предизвици, премрежја и заедничко доживување на нашата „општествена Голгота“, време е да им се поклониме на нашите традиционални духовни вредности, кои се највредното наследство добиено од нашите предци. Време е да ги разбудиме верата, надежта и љубовта и да ги отвориме портите на нашите срца и души за богољубие и човекољубие. Христовото Воскресение, најголемото чудо од сите чудеса на овој свет, нека ни ги осветли патиштата што од нашите домашни прагови водат до божјите храмови, за да ја чуеме радосната вест од Христовите служители. Таа вест повторно ќе не потсети, која е смислата на нашата вера и постоење. Велигден, тој празник над празниците, нека донесе во сите Ваши домови и семејства здравје, среќа, радост, благосостојба и хармонија, и нека ни ја прочисти љубовта кон Севишниот. Да си посакаме сите, Христовото Воскресение да ни ги воскресне насмевките, да ни ја воскресне надежта во поубаво утре и да ни го воскресне нашиот заеднички слободарски дом, домот на вредните и праведните, напиша  Заев во честитката.

OhridNews