Македонскиот репрезентативен играч за врска Марио Ѓуровски најверојатно ќе ја продолжи кариерата во грчки Ерготелис, клубот каде што член беше и поранешниот вардарец Драган Начевски.
Ѓуровски, поради еден непромислен потег, се најде во втор план во Војводина, па единствен избор што му преостана беше интернационална кариера.
Синот на легендата Милко Ѓуровски, според најавите од Србија, имал понуди и од други клубови во Грција, потоа германски, белгиски и холандски екипи, но засега Ерготелис е во предност оти има конкретна понуда.
– Станува збор за вистинска конкретна понуда и, според сé, ќе одам во Грција, во Ерготелис. Имам информации и за други клубови, но конкретни понуди нема. Со Ерготелис сум од порано во контакт и сега се чека само договор на двата клуба. Верувам дека ќе ја сменам средината зимава – вели Ѓуровски.
Младиот играч за врска беше едно од освежувањата во селекцијата на Македонија годинава, кога и дебитира за националниот тим.
