Четири лица сериозно се повредени во инцидентите што во период од една недела се случија во и околу угостителски објекти во Охрид. Последниот се случи завчера во пицерија на градскиот кеј, кога најмалку 6 лица насилно упаднале и брутално претепале охриѓанец пред очите на вознемирените гости, меѓу кои имало и холандски туристи. Две лица завршија во болница, а исто толку се приведени во охридската полиција која трага по останатите учесници во инцидентот, кои, како и нападнатиот, од порано добро и се познати на службата.
И покрај зачестените инциденти во кои има и употреба на оружје, полицијата тврди дека безбедносната состојба во Охрид е стабилна.
– Сите овие нарушувања се инцидентни и никако не смее да им се придава значење дека тоа е секојдневие во Охрид.-вели Стефан Димоски, портпарол на СВР Охрид.
Со цел да се спречат инциденти кои испраќаата лоша порака за Охрид пред почетокот на главната туристичка сезона полицијата најави дека ќе го зголеми своето присуство на терен во текот на целото деноноќие.
– Интензивно ќе бидеме присутни во објектите околу кои се случуваат таквите немили ситуации и бескомпромисно ќе настапуваме, без оглед за кого станува збор.-најавува Димоски,
Јавноста очекува надлежните институции да се справат со насилството во Охрид, бидејќи тоа ја загрозуваа безбедноста на граѓаните и гостите, што негативно влијае на ионака разнишаниот углед на градот.
