Државата очекува повратна информација од Хотелската асоцијација на Македонија – ХОТАМ, во врска со иницијативата за изградба на ски центар на планината Галичица, која според најавите би се реализирала преку јавно приватно партнерство. Членките на ХОТАМ денеска во Охрид ќе одржат состанок, на кој ќе се разговара за проектот за изградба на ски центар на Галичица.
Според експертите со активирањето на зимските потенцијали на Галичица туристичката сезона ќе се продолжи за повеќе од два месеца, а Охрид ќе го стави на мапата на зимски центри.
-Фиксните трошоци преку зима се рак рана за туристичките работници. Со активирање на зимските потенцијали на Галичица ќе се отворат многу шанса за нови работни места и иницијативи, а Охрид ќе живее и зима и лето, вели проф. Д-р Зоран Тунтев од Факултетот за туризам и угостителство во Охрид.
Проектот за изградба на ски центар на Галичица првично беше инициран во 70-те години од минатиот век, а повторно беше реафирмиран во 2006 година. Почетната инвестиција е проектирана на 2,8 милиони евра за изградба на прифатен скијачки центар со потребната инфраструктура и три локации за ресторани од монтажен карактер. Професор Тунтев предупредува дека треба да се внимава при изградбата на ски центарот да не се наруши природниот амбиент на националниот парк во кој живеат голем број ендемски видови флора и фауна.
– Треба да се искористат постоечките капацитети само да се поврзат со ски центарот и нема потреба да узурпираме хектари земја од националниот парк за скијачите да се поблиску до терените, смета Тунтев.
Близината на аеродромот Св. Апостол Павле, планината Галичица ја прави уште поатрактивна за развој на зимски туризам, но проблем претставува патната инфраструктура. Единствениот пат кој води до скијачките патеки е изграден во средината на минатиот век и е надвор од употреба во зима веќе неколку децении. Екепертите посочуваат дека овој проблем лесно може да се реши доколку зад проектот застанат државата и локалната самоуправа, кои треба да ја обезбедат потребната инфраструктура за изградба на ски центар на планинатата Галичица.
Г.М.
