Хуман гест на вредните охриѓанки: Од торта „Етно село“ до здраво дете

Тортата  „Етно село“ на Александра Мутовиќ, која освои прва награда во аматерскиот дел на годинашната хуманитарна „Тортијада“, заврши во рацете на децата со посебни потреби во болницата „Св. Еразмо“ во Охрид. Хуманиот гест, идеја на г-ѓата Нуртен Махмуд, член на ЛК „Охрид“ од специјалната болница го поздравија со воодушевување. Над петнаесет деца од Коснозглобна, заедно со своите мајки, со насмевка го пречекаа ова слатко задоволство.

Од женскиот центар „Бисера“, кои се организатори на годинашната 17-та по ред Тортијада, посочуваата дека секоја година, тортите од овој настан завршуваат на трпезите на здруженијата на деца, на кои им е потребна помош.

Инаку, на традиционалната манифестација која се одржа викендов, своите кулинарски способности ги докажуваа над десет професионални и аматерски слаткари од Охрид и околината.

И годинава настанот, чиј покровител беше Зорица Димитриевска, имаше натпреварувачки карактер. Прво место во конкуренција на професионалци освои тортата „Палешка“ на слаткарницата „Мис“. Второто и третото место беа резервирани за тортите со имиња „Музите“ на слаткарницата „Снежана“ и „Детска Забава“ на „Савита“. Од „аматерките“, покрај 1-во наградената торта „Етно село“, со одличје се закитија и тортите „Маска“ на Ангелина Илоска, односно „Чоколадна торта“ на Марјана Тодоровска.