Ѓоко Танески, Дамјан Пејчиноски, Влатко Лозаноски, учениците од Музичкото Училиште „Методиј Патчев“ и Охридскиот хор ќе бидат дел од Хуманитарниот Новогодишен концерт, што го организира Лајонс Клубот Охрид.
Концертот кој ќе се одржи во среда во Центарот за Култура „Григор Прличев“ во Охрид се организира традиционално, по пети пат, а средствата од продадените влезници ќе бидат наменети за хуманитарни цели. Влезниците за концертот изнесуваат 100 ден, и ќе можат да се набават во Галерија „Букефал“, или на влезот, пред почетокот на концертот.
Во рамки на концертот Лајонс Клубот Охрид ќе го додели Годишното признание „Горна Порта“ , кое се доделува на поединци, организации или здруженија, кои со својот професионален или приватен ангажман, постигнале успех во сферата на хуманизмот, културата, науката и уметноста, промовирале граѓански вредности и придонеле за афирмација на Охрид и Република Македонија.
OhridNews
