-Симона има натпросечна интелигенција, но не гледа ништо и не може сама да се движи. Јас сум половина човек исто така, па често ми помага поголемата ќерка кога ќе е тука, но таа е ученик и не сакам да и го ускратувам детството, раскажува низ солзи Гордана Силјаноска, мајката на малата Симона.
Мајката на Симона која предвреме дошла на свет вели дека лекарите во Македонија сеуште со точност не утврдиле дијагноза, но таа не губи надеж дека нејзината најмала ќерка еден ден ќе прогледа. Затоа и ја однела Симона во специјална очна болница во Белгија каде и било соопштено дека девојчето има погрешна дијагноза.
–Бевме испратени во Белгија со дијагноза, „ретинопатија“, но ми беше кажано дека девојчето ја нема таа болест и дека е потребно да биде прегледано од невролог, а бидејќи јас немав средства за тоа, се вратив во Македонија.-се потсетува мајката Гордана.
Таа се обратила до надлежните институции, како и до Министерството за здравство од кое бара на малата Симона да и се овозможи да биде прегледана во Европската очна болница во Скопје, со цел да и биде утврдена точна дијагноза.
-Го молам министерот Тодоров доколку не верува на оваа приказна да дојде самиот на лице место и да се увери. Јас не барам пари туку да разговара со Европската очна болница каде има документација за малата Симона за да се утврди дијагнозата и доколку има начин да и се помогне да прогледа.-апелира мајката.
Таа посочува дека во државните здравствени установи и било кажано дека девојчето треба да го носи на вежби за слепи деца, иако, како што тврди, никој од докторите кои ја прегледале не сакал на писмено да ги потврди наодите.
-Кога побарав да ми се даде писмена потврда ми беше кажано дека не може да ми се издаде таков документ затоа што девојчето може да прогледа. Па зошто ме праќаат во вакви институции? Доколку немаме соодветни здравствени установи во земјата нека ме пуштат каде што има такви затоа што се работи за 4-годишно дете пред кое е животот, резигнирано рече Силјаноска.
Мајката Гордана истакна дека со случајот на малата Симона е запознаен и премиерот на државата и изрази надеж дека институциите ќе и ја дадат неопходната помош.
-Потребно е што побрзо да се реагира затоа што најмногу може да се направи додека детето е во развој, а доколку Симона неможе да прогледа, тогаш во ред, ќе се обратам во специјализираните здравствени установи за слепи лица, додава Силјаноска.
Гордана Силјаноска е самохран родител на три малолетни деца. Ова охридско семејство живее од социјална помош и детски додаток во вкупна висина од окоу 10.000 денари, но најважно од се на сите им е доколку има и најмала можност да и се помогне на малата Симона да го здогледа светлото на денот.
