Поставување на спомен обележја или спомен плочи на истакнати охриѓани, кои оставиле белег за градот Охрид и кои придонеле за општеството во изминатите 60-тина години е првата иницијатива на охридската Локалната иницијативна група на граѓани, која беше формирана неодамна. Според планираното овој предлог наскоро ќе се најде на дневениот ред на Советот на Општина Охрид.
-Идејата е да се оддаде почит на сите наши сограѓани кои придонеле нешто за нашиот град во различни области од општествено значење, како што се здравството, културата, образованието, спортот, уметноста, економијата, стопантвото, музиката и слично. Личностите во чија чест ќе бидат поствени споменични обележја планираме да ги избереме со јавна анкета, на која секој ќе може да предложи некоја значајна личност од Охрид, вели Славица Ристеска, член на Локалната иницијативна група на граѓани.
Таа појасни дека откако ќе се соберат сите предлози исто така преку јавна анкета или гласање ќе се изберат неколку личности кои подоцна ќе влезат во конкретниот предлог кој ќе биде доставен до охридските советници.
-Откако предлогот ќе помине на Советот, ќе следи понатамошната процедура, при која ќе треба да се одлучи дали ќе се поставува спомен обележје во вид на споменик или пак ќе бидат поставени спомен плочи на живелиштата каде што живееле или биле родени заслужните охриѓани. За поставување на ваквите обележја освен од Локалната самоуправа, помош ќе побараме и од локалниот бизнис сектор, вели Ристеска.
Таа објасни дека Иницијативната група на граѓани има за цел да ги поттикне граѓаните на Охрид да станат активни чинители и да влијаат на одлуките на Советот на оштината, со што би придонеле за поквалитетен живот во заедницата. Иницијативната група која постојано прима нови волонтери, во иднина ќе организира и други средби и трибини, на кои би се дебатирало за различни прашања и проблеми од секојдневното живеење во Охрид.
Е.М
